STAFNINN RÓÐRAFÉLAG

Strákarnir á Argja bátnum

2010-02-07T21:54:00.003Z

Hérna getið þið séð æfingu hjá áttæringnum "Argjabáturinn" i Þórshöfn.

Hér sjáið þið pebb-myndband sem sömu strákar hafa sett saman.

Njótið

Undirbúningur hafinn að nýju.

2010-01-13T00:31:00.003Z

Undirbúningsvinna er hafin að nýju við að koma félaginu á siglingu fyrir sumarið.

Leitað er nú eftir fólki til að sitja í stjórn og nefndum félagsins.

kv.

formaður

Vinnufundir.

2009-03-03T10:27:00.002Z

Vinnufundi var frestað vegna ÍBR þings á fimmtudaginn síðastliðinn.

-Nýr fundartími verður bráðlega auglýstur og sendur út til hópsins sem vonast er til að geti orðið "bakhjarl" og hugmyndasmiðir félagsins. Þannig verði hægt að sjósetja starfsemi þess með myndarbrag og tryggja framgöngu íþróttarinnar.

kveðja:
Guðmundur H. Arngrímsson

Sótt um styrki

2009-03-03T10:16:00.004Z

STAFNINN, Róðrafélag hefur nýlega sent umsókn um styrk til eflingar á svæðasamstarfi við frændur okkar og frænkur í Færeyjum.

Sótt er til samtaka sem stuðla að eflingu á svæðasamstarfi við norðuratlandshaf.

Verkefnin sem sótt var um styrki til ganga út á að skapa vettvang fyrir samvinnu og útbreiðslu á færeyskri róðramenningu. Færeyska róðramenningin hvílir á sameiginlegum arfi okkar sem búum hérna við norðanvert atlandshaf.

Verði þessi verkefni að veruleika mun það stórefla samvinnu þjóðanna á sviði íþrótta og menningar.

Vinnufundur.

2009-02-15T18:36:00.004Z

Boðað hefur verið til vinnufundar vegna framtíðarskipulags- og starfsemi félagsins. Fundurinn fer fram fimmtudaginn 26. febrúar 2009 í sal Færeyska Sjómannaheimilins Örkin, að Brautarholti 29. Fundurinn hefst kl. 20:00 og áætlað verði lokið kl. 21:30.

Þeir sem hafa áhuga á að taka þátt í vinnufundunum og starfi félagsins eru hjartanlega velkomnir.

Meðfylgjandi er fundarboðið sem sent var út á hóp einstaklinga.

Kveðja.

Stafninn með fulltrúa á siglingaþing.

2009-02-15T16:31:00.002Z

Sunnudaginn 22. feb. 2009, heldur Siglingasamband Íslands með siglingaþing. Íþróttasamband Reykjavíkur verður með 14 fulltrúa á þinginu. Okkur hefur verið boðið að vera með 1 fulltrúa á þinginu.

Núna er að skapast grundvöllur fyrir að koma starfsemi félagsins í almennilegt horf.

Nýtt róðratímabil að hefjast.!

2009-02-11T23:29:00.004Z

Nú fer í hönd vinna við að endurskipuleggja innviði og starfsemi félagsins.

Nú síðastliðinn nóvember fékk róðrafélagið samþykki á lagabálki sínum og íþróttinni sem við ætlum að stunda. Á sama tíma varð félagið fullgildur meðlimur Íþróttabandalags Reykjavíkur. Þannig hefur skapast grundvöllur til að koma starfsemi þess í eðlilegt horf.

Síðasta sumar endaði snubbótt, en þrátt fyrir smá erfiðleika og byrjendabrag þá leggjum við eigi árar í bát.

Nú er ætlunin að efna til vinnufunda með áhugasömum aðilum, ræða um innviði og uppbyggingu félagsins og þannig koma almennilegum undirstöðum undir það. Við höfum fengið góð orð utan úr Færeyjum og munum reyna draga eins mikin lærdóm og mögulegt þaðan.

Þeir sem hafa áhuga eða komu með einhverjum hætti að félaginu síðasta sumar eru hvattir til að hafa samband.

Stefnan er að halda 2-3 fundi á næstu 2 mánuðum og halda síðan aðal- og opinn kynningarfund þar sem félagið yrði formlega fullgilt félag og vonandi með starfsemi sem ungir sem aldnir geta nýtt sér.

Róðrakveðja.

Guðmundur Arngrímsson
Sverrir Björgvinsson

Fyrsta mót færesyku deildarinnar.

2008-06-10T22:04:00.004Z

Fyrsta mót færeysku róðradeildarinnar 2008 var haldið á sunnudaginn var þ. 7. júní. Á þarlensku heitir mótið(norðoyastevna) og er ávallt haldið annan sunnudag í júní. Mótið var haldið á Norðurey, nánar tiltekið í Klaksvík, en víkin skartaði sínu fegursta á mótsdaginn. 64 áhafnir luku keppni í 1000 og 1500 metra róðri. Úrslitin er hægt að sjá hér.

Myndir frá keppninni er hægt að sjá hér.

Stjórn félagsins á sinni fyrstu æfingu.

2008-05-28T01:56:00.003Z

Meirihluti stjórnar félagsins tók sína fyrstu æfingu nú kvöldandvaranum ásamt þremur vöskum piltum sem tóku hressilega á árunum. Nú æfir sveitin tvisvar í viku, og virðist það ætla að ganga vel að fullmanna bátinn. Stofnendur félagsins hafa verið iðnir við kolann í róðravélunum síðustu vikurnar og það skilar sér í fínu úthaldi.

Nú er bara vonandi að fleiri hópar komi til og stofni róðrasveitir og hægt verði að blása til fleiri róðrakeppna í sumar.

Kvöldæfing

2008-05-28T01:47:00.003Z

Nokkur lið voru á æfingum í kvöld. Lag er komið á sjósetningu og landtöku á bátunum og gengur það allt orðið nokkuð vel fyrir sig. Leirvíkingur lak nokkuð hressilega hjá Eyþóri og félögum en það kom ekki að sök og réru þeir í rúman klukkutíma í suðaustan andvara úti á Skerjafirðinum.

Hátíð Hafsins

2008-05-27T10:36:00.002Z

Hátíð hafsins er á nú á komandi helgi. Mikið verður um að vera í reykjavíkurhöfn bæði laugardag og sunnudag. Lið sem æfa nú kappróður í Nauthólsvíkinni munu etja kappi á sunnudaginn kl. 15:00. Við hvetjum alla sem hafa heimangengt að mæta niður á höfn og njóta alls þess sem í boði er. Hátíð hafsins er skipulögð af Sjómannadagsráði, Höfuðborgarstofu og Faxaflóahöfnum.

dagskrá hátíðarinnar er að finna á heimasíðu hennar :

http://www.hatidhafsins.is/

Umfjöllun um Stafnið í Morgunblaðinu

2008-05-26T12:26:00.003Z

Á forsíðu morgunblaðsins í dag er sagt frá stofnun og starfsemi Stafnsins. Mikill áhugi er fyrir félaginu og margar fyrirspurnir verið sendar inn.

Undanfarna daga hefur verið unnið að því að auðvelda sjósetningu og landtöku á bátunum. Smíðaðar hafa verið brautir sem bátarnir eru látnir renna eftir. Einnig eru í smíðum tveir vagnar sem gera sjósetningu og landtöku aðgengilega fyrir alla. En eins og lesa má í grein morgunblaðsins þá geta flestar áhafnir borið bátin á milli sín styttri vegalengdir.

Æfingatöflur á vefnum.

2008-05-21T12:07:00.002Z

Nú eru komnar æfingatöflur á netið. Þar er hægt að skrá æfingatíma fyrir áhafnir. Liðsstjórar eru ábyrgir fyrir að láta vita af breytingum. Það er hægt með því að skilja eftir skilaboð á stafnid@internet.is.

Liðsstjórar skrái æfingatíma á netinu með því að velja viðkomandi dag og tíma. - Muna eftir að skrá nafn liðs, liðsstjóra og símanúmer.

Æfingatöflurnar eru á tenglalistanum til hægri á síðunni.

Hér eru æfingatöflurnar. Hafið samband í síma 698 5216 ef einhverjar spurningar vakna.
Kv. Guðmundur

http://www.my.calendars.net/leirvikingur

http://www.my.calendars.net/gammur

Havnar Róðrafélag.

2008-05-18T22:27:00.008Z

Havnar Róðrafélag í Þórshöfn í Færeyjum verður vinafélag Stafnsins, og væntum við mikils af þeim vinskap. Félagið er það stærsta í Færeyjum og hefur meðal annars innan sinna raða ólympíumeistara í róðri frá ÓL í Aþenu 2004, sem sér um þjálfun hjá einni áhöfninni.

Á heimasíðu þeirra er hægt að skoða myndir frá keppnum þar í landi og finna ýmsan fróðleik um íþróttina. Undir "drekavarpið" er svo hægt að skoða myndskeið frá fjölmörgum mótum. Þar sést vel hvernig íþrótt þetta er og hvernig að henni er staðið.

Nú í byrjun júní byrjar róðradeildin hjá þeim í Færeyjum og eru 82 lið skráð til keppni í 6, 8 0g 10 -æringum, í þremur aldursflokkum í karla og kvennaflokki. Deildinni lýkur svo á Ólafsvökunni síðustu helgina í júlí.

Heimasíða Havnar Róðrafélags.

Við hvetjum fólk til að kynna sér félagið og starfsemi þess.

Stjórnarmenn meta aðstæður.

2008-05-18T16:03:00.002Z

Hér eru tveir af stjórnarmönum félagsins þeir Sverrir Björgvinsson og Gústaf Ómarsson að meta aðstæður í Nauthólsvíkinni. Í bakgrunni er Gammur og í forgrunni er "Leirvíkingur"

Fyrsta æfing Stokkana

2008-05-18T13:43:00.003Z

Lið skipað færeyskum róðrasnilingum sem búa hér á Íslandi tók fyrstu æfingu tímabilsins á föstudaginn var. Það reyndi á útsjónarsemi viðstaddra að sjósetja bátinn, en æft var á Gammi. Það er útséð að gera verður varanlegar ráðstafnair í sambandi við sjósetningu og landtöku bátanna. Bátarnir eru viðkvæmir og því er mikilvægt að meðhöndlun á þeim sé ekki þannig að þeim stafi hætta af.

Stokkarnir réru út á firðinum í köldu og gráu föstudagskvöldinu. Áhafnarmeðlimir eru eldri en tvævetur þegar kemur að róðramálum og geta kennt okkur hinum eitt og annað í sambandi við meðhöndlun á bátum og fylgihlutum.

Æfingatafla fyrir bláa bátinn

2008-05-18T11:36:00.003Z

Hér kemur æfingatafla fyrir bláa bátinn. Báturinn er nafnlaus en færeyingar sem róið hafa áður til sjómannadagsróðurs segja bátinn heita "Leirvíkingur". Það er ágætt nafn og ef eigendur bátanna hafa eingar mótbárur gagnvart þeirri nafngift þá er einsýnt að báturinn beri það nafn.

Æfingatímar.

2008-05-16T16:44:00.002Z

Það auðveldar allt utanumhald ef þær áhafnir sem ætla að æfa fram að sjómannadegi og/eða að ganga í félagið reyni af fremsta megni að koma sér saman um fasta æfingatíma. Þannig verði það tryggt að áhafnir gangi að bátunum vísum og engir árekstrar verði á milli áhafna um not af bátunum.
Eins og áður hefur verið sagt þá mun Gammurin verða notaður til 1 klst æfinga en (nafnlausi) blái báturinn til 1 og 1/2 klst æfinga.

Björgunarvesti.

2008-05-16T16:40:00.002Z

Sjómannadagsráð Reykjavíkur og Hafnafjarðar hefur látið okkur hafa til afnota björgunarvesti sem mælst er til að allar áhafnir noti við æfingar. Vestin eru uppblásanleg og létt og fyrirferðalítil.

Æfingatafla fyrir Gamminn

2008-05-14T14:16:00.002Z

Gammur er annar af tveimur bátum sem sjómannadagsráð lagði fram til félagsins. Hér kemur æfingataflan fyrir hann. Vinsamlegast hafið samband við Guðmund Arngrímsson í síma 698 5216 eða sendið póst á stafnið@internet.is og pantið tíma. Jafnóðum og æfingatími er frátekin mun því verða bætt á töfluna ásamt uppl. um liðstjóra eða símanúmer viðkomandi.

Æfingatímar

2008-05-14T00:25:00.000Z

Bátarnir eru staðsettir í Nauthólsvík, við siglingaklúbbinn Siglunes. Til að geta komist út að róa þurfa liðin að skipa með sér liðsstjóra/formann, sem verður ábyrgðarmaður liðsins gagnvart félaginu. Liðsstjórinn fær lykla að húsnæðisaðstöðu félagsins, sem og lykla að lásum sem eru á bátunum sjálfum.
Bátarnir verða sjósettir á hlunnum og er mikilvægt að í lok æfingar eða í lok dags að bátunum sé vel fyrir komið og tryggilega frá þeim gengið. Á milli æfinga er mikilvægt að báturinn sé tekin á þurrt ef liðin skiptast ekki beint á bátum við lok æfingatíma.
Þegar liðstjóri hefur fengið lyklavöld sjá þeir um æfingar sinna áhafna gagnvart félaginu. Þar sem einungis tveir bátar eru hjá félaginu næstu vikurnar verður að skipa málum þannig að gerð er æfingatafla fyrir alla vikuna. Hver æfingartími er annarsvegar 60 mínútur og hinsvegar 90 mínútur, sem skiptist á bátana tvo. Eftirspurn eftir æfingartímum verður að leiða í ljós hvort nauðsynlegt reynist að koma á kvóta eða takmarka ásókn í vinsæla æfingatíma.

Af gefnu tilefni er vert að minnast á það að öll meðferð áfengis og tóbaks er bönnuð innan ramma félagsins. Mikilvægt er að virða þessa reglu, því að á svæðinu fer fram mikið unglinga- og æskulýðsstarf.

Með kveðju

STAFNIÐ RÓÐRAFÉLAG hefur tekið til starfa

2008-05-13T23:53:00.000Z

Þriðjudag þ 6. maí fékk STAFNIÐ Róðrafélag afhent til afnota 2 kappróðrabáta frá sjómannadagsráði. Sá atburður markar ákveðin þáttaskil í því undirbúningsstarfi sem stjórn félagsins hefur staðið að síðan í haust. Bátarnir eru sexæringar, nýlega smíðaðir og í topp ástandi. Aðstaðan sem félagið hefur fengið úthlutað hjá Reykjavíkurborg er í Nauthólsvík, nánar tiltekið við Siglunes. Þar mun félagið deila húsakostum með Hjólreiðafélagi reykjavíkur og ekki að efa að sú sambúð verði gæfurík. Bátarnir eru á kerrum og bátunum verður að slaka niður rennu eða á hlunnum niður í sjó. Mikilvægt er svo að bátarnir séu teknir upp eftir hverja æfingu eða í að minnsta kosti í lok dags. Við bjóðum alla velkomna í félagið, fyrst um sinn verður ekki innheimt félagsgjald því framundan er skipulagsstarf sem við vonum að sem flestir komi að.

Félagið hefur gert munnlegan samstarfssamnig við Havnar róðrafélag í Þórshöfn og væntum við mikils af þeim samskiptum við frændur okkar færeyinga. Á næstu dögum verður bætt við meira efni inn á síðuna, svo sem æfingatöflu, upplýsingar um öryggis og umgengnismál, um íþróttina sjálfa o.s.frv.

Frekari upplýsingar er hægt að nálgast í síma 698 5216 eða í netfangið stafnid@internet.is
Með Kveðju.
Guðmundur Hrafn Arngrímsson